尋日睇o左套《吉屋出租》(Rent)，好開心、好滿足，因為好耐冇睇過o的咁好睇o既歌舞片，於是買定包煙、飲杯咖啡，準備寫鑊勁o既，點知...
注意:本文章絕無對任何宗教團體作惡意評擊，一切由電影觀點出發，若有任何惡意留言，本人有權刪除，敬請注意！

飲完咖啡買完煙，上網睇o下有咩《吉屋出租》o既相關資料，睇o下多唔多人講哩套勁o野，點知搵搵下，竟然搵到一個講《斷背山》o既blog，我好奇怪，點解《斷背山》o既題又會有人講《吉屋出租》o既呢？唔通有人將兩套戲link埋一齊講？於是好八卦咁入o左去睇喇。

一入到去，完來係我之前一直避開唔想睇o既o野，詳細我唔講喇，總之有人鍾意《斷背山》大讚特讚，有人唔鍾意同性戀，仲不斷引用聖經，列明幾章幾節對同性戀大肆批評，咁都唔止，仲講o左好多我覺得好易答o既問題，例如：

一：「李安該快被公認是目前世上最會表達的人了，他讓許多人突然間領悟什麼是『愛』」
（當然啦，你當李安的《情感三部曲》(Father Knows Best Trilogy)、《理智與感情》(Sense and Sensibility)、《臥虎藏龍》(Crouching Tiger, Hidden Dragon)流o既！）

二：「這部電影(指《斷背山》)製造出來的『愛』，和《麥迪遜之橋》(The Bridges of Madison County)一樣，是假的『愛』」
（我認為所說的『假愛』，根本稱不上愛，世上只有『愛』與『不愛』，嚴格o黎講係沒有什麼所謂的『假愛』）

三：「這部電影的『愛』，只是用來得獎方便」
（啊，是嗎？據我這個小戲迷所知，李安在一開始看過這短篇小說後，怕沒人欣賞、沒人投資，所以擱置了一段時間，在經父親臨終前鼓勵，才大著膽子，不怕沒人看，只要想拍就拍的心態去拍，若為了得獎，套o野早就拍o左，亦可能係角逐第77屆奧斯卡唔係第78屆奧斯卡囉）

四：「真正的愛，不是滿足自己自私的肉慾。真正的愛，不是偷偷摸摸，背著人去行羞恥的事。
哥林多前書13:5
愛是不做害羞的事，不求自己的益處。」
（對啊，戲中最後積克冇再隱藏佢o既性取向啦，咪就係因為咁比你哩種人當劊子手殺死囉）

最搞笑o既係，唔知o的人鬧到火紅火綠定乜啦，總之有人摷埋與同性戀有關o既《Rent》出o黎講，仲要斷章取義，話《Rent》入面所講o既“活在當下，珍惜今天”，歪曲成“活在當下，可以亂o黎，鍾意吸毒就吸毒”之類o既意思，What a shame！咁都得？第一個感覺，我問自己：「以後仲好冇寫我對電影o既感受？難保有日我講一o的類似題材o既戲，比人惡意踩場嫁喎！」，o個一刻，乜都唔想寫，覺又訓唔到，所有想寫o既o野o係腦海中一掃而空，甚至諗過好似某幾個寫《斷背山》o既blog咁刪blog了事，後來打電話比好友小馬同魚生，他們給予了點意見後，我決定，點都要轟轟烈烈咁講一劑！咁樣先係我o黎！

我唔明，點解到o左今時今日，都有人會話：「基佬片？唔睇！」點解唔可以話：「劇情片？唔睇！」「愛情片？唔睇！」？同性戀不可以有愛？是否真的如戲中積克所謂：「你對我來說太奢侈了！」我明白某宗教是反對同性戀，我亦對此作出專重態度，不過我相信他們已很辛苦了，放他們一馬吧好嗎？記得有一次我心情墜進谷底，wallpaper正用了艾尼斯與積克望著斷背山的那副，這時我正坐著想東想西，突然間，心中不禁納悶，「為何他們目不轉睛地望著斷背山」，良久，我完完全全明白他們在想什麼了，「人人心中都有一座斷背山」一句，除了代表是一種盼望、一個夢想之外，原來還有另一涵意，若斷背山只有他倆，沒有其他世俗眼光、沒有岐視，他倆還要隱藏著真愛嗎？傑克會那樣地死去嗎？他倆的妻子會受到傷害嗎？他們只是想要一座小小的斷背山，可以容納他們的小天地罷了，但代價是什麼？就是生命！要記住，戲中說過當時男人到了某年紀未結婚，就會像獵物般被盯著，那到底要和一個不愛的人結婚，傷害無辜的她更甚的還有下一代？還是放棄奢侈的愛？又還是讓你們去殺死他？沒有你們這種人，艾尼斯最後會這樣嗎？背已斷，一生中的唯一倚傍沒有了，這樣與種族大屠殺有何分別？

另一點，為何不能將《斷背山》當成異性戀欣賞？若將其當成普通異性戀愛情片看，我可找不出會有何破綻；記得早陣子看了《舞．出色》(Take The Lead)，記得最後一眾小子們在比賽後出場大跳hip-hop，這意味著“對，你們這班拉丁舞老手可能比我們稍勝一籌，但是我們還懂得跳hip-hop，而你們則未必可以跟我們跳得一樣好。”，我覺得這可以引用到《斷背山》，同性戀觀眾往往可以代入一般異性戀愛情片來欣賞，反之，因為同性戀題材所以不看《斷背山》的你就做不到了！是領悟力不足？想像力不夠？乜都好啦！

曾經睇過一集《白宮群英》，入面有段劇情講有個被判死刑的人尋求總統特赦，於是找了新聞主任Toby幫助，Toby是個猶太人，他問他教會的長老意見，由於太耐喇，記得不算好清楚，但大致上是：「長老，猶太教不是主張以眼還眼的嗎？」長老回答：「是，但到了今時今日，隨著時代的變遷，我們該做現時正確的事，某些舊世代不好的東西是要拋棄的。」我很認同！

記得一早同好多朋友講過，《斷背山》應該囉唔到奧斯卡best picture，初時都耿耿於懷，感到不值，後來有一古怪想法驟上心頭，“囉唔到，才會令《斷背山》更加成功，令更多人起碼暫時性正視哩個問題”，至於《斷背山》效應可以維持多久？即管看看吧。

最後要講聲多謝，多謝您睇哂成篇文章，我都要講聲唔好意思，我之前o既寫blog宗旨係唔好太多字，不過今次太嬲，要破一破戒，對不起！